|
AKI
YERUSHALAYIM #76
REVISTAS
ETSI
Juin 2004 Volume 7 No. 25 ISSN 1288-6726
Revue de Genealogie et d’Histoire des Sefarades
Laurence Abensur-Hazan
77 Bvd Richard-Lenoir, 75011 Paris
Este numero de la revista Etsi ke se espesializa en la investigasion jenealojika i istorika de las komunidades sefaradis, mos trae un muy interesante estudio sovre la famiya Barki de Izmir, Turkia, ke prezenta unos kuantos misterios, uno de los kualos es la orijin de esta alkunya. Los Barkis ke sus prezensia en el Imperio Otomano es notada despues del siglo 16 konstituyen oy un grupo bastante numerozo de famiyas, la mayoria de las kualas emigraron de Izmir verso la fin del siglo 19 i prinsipios del siglo 20, a Ejipto, i de ayi a Evropa, Amerika, Afrika del Sud i Israel. El artikolo analiza las teorias i tradisiones ke existen sovre la orijin de esta alkunya i pasa despues a una analiza detaliada de los ramos de la famiya en Turkia.
Este numero de la revista tiene tambien un artikolo sovre un rejistro de sirkonsiziones del rabino Habib Toledano de Maroko i informasiones diversas, komo por enshemplo los adresos elektronikos de los sitios de Internet de la revista i de la asosiasion de orijinarios de Ejipto.
|