|
AKI
YERUSHALAYIM #76
REVISTAS
MAGEN-ESCUDO No. 129
Moises Garzon Serfaty
Asociacion Israelita de Venezuela - Pajina
Avda. Principal de Mari Perez Los Caobos - Caracas 1050
ISNN 0798-1961
Es ke el autor del Don Quijote, Miguel de Cervantes, era un kripto-djudio, desendiente de los djudios ke duvieron konvertirsen para poder kedar en Espanya, despues del Edikto de Ekspulsion de 1492.
Las repuestas a esta demanda son diferentes, dependiendo de ken las da, mas de los siete artikolos sovre este tema en la rubrika “Dossier” del No. 129 de Magen-Escudo, solo uno da una repuesta negativa mientres ke los otros apoyan, ken kon mas i ken kon menos konvinksion, la teza del “Cervantes kripto-djudio”. Eyos apoyan sus argumentos kon una analiza de las palavras ke el famozo eskritor uzo i de algunas de sus ideas i opiniones, ke paresen ser tomadas de la Biblia, del Talmud o del Zo’har; kon su opozision a la “limpieza de sangre” ke devian provar todos los ke kerian entrar a la armada a un orden relijiozo; por la semejansa entre la mujer ke amava, la Dulcinea, i la Shehina, la prezensia del Dio onde los djudios; i en fin kon el idealizmo ke se reflekta en todas sus palavras, su demanda de personas ke enkontrava en el kamino ke pagen sus respektos a Dulcinea mizmo sin konoserla,“que sin verla la habes de creer, confesar, afirmar, jurar y defender” ke es exaktamente lo ke demanda la relijion djudia: “el amor a un Dio ke sin ser visto deve ser kreido, afirmado, djurado i defendido”.
En desparte de estos muy interesantes artikolos sovre Cervantes, este numero de Magen-Escudo tiene tambien artikolos sovre aspektos diversos del djudaizmo i de la komunidad djudia de Venezuela.
|