|
AKI
YERUSHALAYIM #76
REVISTAS
LADINAR III
Investigasiones sovre la literatura, muzika i istoria de los ladinoavlantes
Yeudit Dishon i Shmuel Refael
*Sentro Naime i Yeoshua Salti
*Fondo al nombre de Shelomo Reuven
*Universidad Bar Ilan
El ekipo de investigadores de la kultura djudeo-espanyola en la Universidad Bar Ilan mos prezenta aki un muevo rekolio de artikolos sovre aspektos diversos de esta kultura. Dos de estos artikolos son partikularmente interesantes para mozotros porke tratan mas espesifikamente del ladino i de su kreasion literaria.
El primero es el artikolo del Dr. Shmuel Refael sovre “Las koplas de la berendjena”, onde amostra ke esta no es una simple poezia en la kuala se deskriven los diversos modos de los kualos las mujeres sefaradis gizavan la berendjena. Sigun el se trata aki de una poezia de karakter sosial, en la kuala se konsiente una nota de kritika a la mujer sefaradi: en la mayoria de las koplas de esta poezia se trata de mujeres kon nombres komikos, ke no tienen ofisio, ke komen demazia i mas.
El segundo artikolo del kual keremos avlar, de Nitsa Dori, trata de dos romanes en ladino sovre la ”Affaire Dreyfus”. Eya los analiza del punto de vista literario i tambien del punto de vista de sus kontribusion al espandimiento de la ideolojia sionista al seno de las komunidades sefaradis de los Balkanes.
|