|
AKI
YERUSHALAYIM #76
REVISTAS
SEFARAD
Anyo 64 Fasikulo I
ISSN 0037-0894
Revista de Estudios Hebraicos, sefardies y de Oriente Proximo
Dir. Manuel Molina
CSIC Duque de Medinacelli 6, 28014 Madrid
La soltura de sfuenyos es un tema ke intereso a la djente desde los tiempos mas antiguos i kontinua a interesarla asta oy. En la istoria del puevlo djudio, por enshemplo, seay munchos kavzos de sfuenyos ke tuverion konsekuensas importantes komo los sfuenyos ke sonyo Yosef i su reushidad a soltar el sfuenyo de Paro kon las siete vakas godras i las siete flakas.
Es natural entonses ke muestros savios rabinos se interesaran eyos tambien de topar soltura a sfuenyos ke tenian eyos o ke les eran kontados. Uno de estos es rabi Moshe Almoslino (del kual ya tratimos en presedentes numeros kon relasion a sus livros “Rijimiento de la vida” i “Kronika de los Reyes Otomanos”) ke eksrivio un livro sovre este tema, “El tratado de los sfuenyos”, i trata ayi de un sfuenyo ke tuvo sovre Don Yosef Nasi.
Este sfuenyo es analizado por Pilar Romeu Ferre en un artikolo publikado en el numero 64/1 de la revista Sefarad kon el titolo “El sueño premonitivo de Moises Almoslino sobre Yosef Nassi en el Tratado de los Sueños, Salonico 1564”.
Despues de aver deskrito en detalio este sfuenyo i la soltura ke le da Almoslino, segun el kual Don Yosef Nasi de mizmo ke el Yosef bibliko yegaria a altos postos i tendria una grande desendensia, kon munchos ijos i inyetos, Pilar Romeu apunta ke esta soltura se realizo solo en parte. Es verdad ke Don Yosef se gano la amistad de los sultanes Soliman el Manyifiko i Selim III, i yego a tener un grande poder politiko durante sus reyno i mizmo kon la suvida al trono de Murad III, ma de otra parte el no tuvo ijos i despues de su muerte, en 1579, su fama no le sovrebivio i el fue olvidado kaje asta muestros dias.
Djuntos kon esto es apuntado en la konkluzion de este artikolo, el livro “Tratado de los Sfuenyos” es un testimonio muy enteresante de la komunidad djudia de Estambol en el siglo 16 i de los personajes-yave ke aseguraron la kontinuidad del puevlo djudio en la Diaspora despues de la kriza de 1492.
En desparte de este artikolo el No. 64/1 de Sefarad inkluye sinko estudios mas sovre un kante indedito (en italiano) de Salomon Usque; el mito de un aserkamiento entre los djudios i arrianos; un komentario bibliko de Rashi; la konstruksion de un mito istoriko sovre la plebe i los djudios; i enfin la Sinagoga del Sofer, en Toledo, i su lokalizasion.
|