AKI YERUSHALAYIM #76

LIVROS

EL ÚLTIMO SEFARADÍ
ISBN 84-96235-01-7
Miguel Angel Nieto
Calamar Ediciones - Pajina
Gran Villa 69, Of. 412 28013 Madrid

Fruto del filmo de televizion produsido en kolaborasion por Television Española, Arte i Alea Television, “El Ultimo Sefaradi” es una koleksion de tekstos kon las entrevistas ke fueron echas para este filmo kon serka de 60 sefaradis de diversas partes del mundo.

En su introduksion Miguel Angel Nieto, ke fue tambien el direktor del filmo, apunta ke “…este libro es un paseo por una cultura y una lengua al borde, hoy, de la extincion”, deskripsion de la kuala puedemos akseptar solo la primera parte. En efekto, el ke sige estos ultimos anyos el dezvelopamiento en este kampo no puede niegar ke, leshos de una “ekstinsion”, se nota ayi un proseso de revitalizasion de esta lengua i de su kultura ke sorprende por su dinamizmo i el entuziazmo ke esta kreando al seno de los sefaradis de avla djudeo-espanyola. Es verdad ke este es un proseso ke se topa ainda en su primera faza, ma esperamos ke el se dezvelopara i se enfuertesera mas i mas.

Tambien mos parese inakseptable el titolo de este filmo i del livro “El ultimo sefardi”, ke es posible ke tenga impakto i ayude a su popularidad ma no reflekta la realidad. Kon toda la amistad i apresiasion ke tenemos por Eliezer Papo, ke konsideramos komo amigo i kolaborador en la lucha para el futuro de la kultura djudeo-espanyola, estamos konvensidos ke despues de el tambien avra otros sefaradis ke ovraran para mantener sus identidad kulturala espesiala.

Esto dicho, devemos tambien ekspresar muestra apresiasion por el grande esforso ke fue echo, sin avlar de los fondos ke fueron investidos, para la produksion de este dokumentario ke tuvo una grande reushidad i fue premiado en festivales de sinema en Miami, Hamburg San Francisco.

Las entrevistas son muy interesantes i dan, todas endjuntos, una idea de la rikeza i ermozura de la kultura djudeo-espanyola, de lo ke eya reprezenta para los sefaradis mizmo agora, kuando esta en una situasion tan difisil ke munchos pensan ke esta agonizando, mientres ke de otra parte ay munchos tambien ke no keren renunsiar a este trezoro kultural i estan luchando para asegurar su kontinuidad.

Volver