|
AKI
YERUSHALAYIM #76
LIVROS
SMYRNE
SMYRNE ISBN 2 84910 054 4
Evocation d’une Echelle du Levant XIX – XX siecles
Red. Laurence Abensur-Hazan
Editions Alan Sutton - pajina
8, Rue du Dr. Ramon, 37 540 Saint-Cyr-sur-Loire
Izmir, la sivdad turka ke su komunidad djudia viene en segundo lugar despues de la de Estambol por su importansa en la istoria del djudaizmo turko, okupo tambien un lugar muy importante komo sentro de komersio entre la Turkia i el Oksidente.
En realidad la sivdad empeso a dezveloparse en el siglo 16 despues de un akordo entre el governo otomano i las potensias komersiales oksidentales de akeya epoka, aziendo de Izmir, kon su manyifiko golfo, el porto prinsipal para la eksportasion de los produktos agrikolos de Anatolia. El dezvelopamiento de esta sivdad atiro ayi munchos djudios ke vinieron de las sivdades serkanas i de afuera de Turkia tambien, kreando ansi una komunidad dinamika i enfloresiente, a lo menos por una grande parte del siglo 16 i del siglo 17. En este livro ke sovresale por su aspekto estetiko i las numerozas ilustrasiones, tomadas de su propia koleksion de kartas postalas, Laurence Abensur-Hazan mos da una imajen muy interesante de esta sivdad ke asta los prinsipios del siglo 20 era un sentro kosmopolita, kon una povlasion formada por gregos, ermenis, djudios i turkos.
Eya aze esto tambien kon una muchidumbre de sitasiones de eskritores oksidentales ke vijitaron en Izmir a lo largo de los anyos i desharon deskripsiones muy bivas i interesantes de la sivdad i de su povlasion.
El livro trae, ademas, importantes detalios sovre la baza ekonomika de la sivdad (la eksportasion de produktos agrikolos i importasion de produktos industriales de Evropa), los lavoros i ufisios de los djudios, las kazas onde moravan i tambien desgrasias komo los fuegos ke devastaron grandes partes de la sivdad, los terretemblos, epidemias i mas.
|