AUTORIDAD NASIONALA DEL LADINO
|
AKI YERUSHALAYIM #76 LIVROS “Quien no mantiene en su intimidad el deseo de conocer como eran sus padres y abuelos, sus amistades, ideales i tradiciones?” Esta demanda, echa por Jacobo Cohenca en la introduksion del livro del kual tratamos, reflekta un sintimiento universal ke konsentimos todos kon mas o menos intensidad. Ma la verdad es ke muy pokos van mas ayi ke ekspresar este dezeo i azen un esforso seriozo para konoser la istoria de sus famiya. Aun mas pokos son los ke azen prova de la grande perseveransia de la kuala ay menester para dezembaranyar la red de relasiones familiales ke se krearon kon los anyos, konsultar archivos i dokumentos familiales, entrevistar diezenas i a vezes sienes de personas i desinar poko a poko el arvole jenealojiko de la famiya, yegando de muestros dias asta sienes de anyos atras. Jacobo Cohenca izo este esforso, a lo largo de kinze anyos desde 1989 i asta el 2003, anyo en el kual fue publikado el fruto de su lavoro: un manyifiko livro, de mas de 500 pajinas, ilustradas kon numerozas fotografias, ke trasan la asendensia de las famiyas Cuenca, Paredes, Yeoshua i Mizrahi, asta las sivdades de Cuenca i Paredes de Nava, es Espanya onde bivieron sus antepasados asta la ekspulsion de 1492. “Dispercion y reencuentro” no es, djuntos kon esto, un simple livro de jenealojia ke bushka a fiksar en primer lugar ken es ijo de ken, kuando nasio i murio, kon ken se kazo, si tuvo ijos i ijas, i ansi de una jenerasion a la otra asta yegar a los mas leshos ke se pueda en la istoria familial. Este livro trae una informasion muy detaliada de este punto de vista sovre las kuatro famiyas ke mensionimos, ma en desparte de esto sovresale tambien por la rikeza i la informasion sovre sus istoria, ansi komo sovre la istoria de otras famiyas kon las kualas tenian relasiones de parientez, komo las de Santangel, Chinio, Cassuto, Alcalai, Benveniste, etc. Muy interesante es tambien la deskripsion ke mos es dada de la istoria ansi ke de la vida sosiala, ekonomika i kulturala de las komunidades ande bivieron miembros de estas famiyas, en Espanya, en el Imperio Otomano i mas tadre en Amerika del Sud i sovre todo en Paraguay, onde nasio el autor. Toda esta informasion es de grande valor no solo para los miembros de las kuatro famiyas mensionadas mas ariva, sino ke tambien para todo el ke se interesa de la istoria i kultura de los sefaradis, i de este punto de vista Jacobo Cohenca merese toda muestra apresiasion i elojios por su ovra. |
DISPERSIÓN Y REENCUENTRO