LIVROS
Zelda Ovadia
El livro es un buen amigo
I siempre esta konmigo
Dia i noche, sin muncho preguntar
Esta pronto a ayudar
Livros de filozofia
Matematika i sensias
Inglez, fransez i italiano
Mos embezan muncho bueno
El Livro de los Livros es la Biblia,
Ke konta la larga istoria
Del puevlo de Israel
Ke ainda esta asperando a su Goel
Aboltando las ojikas
Vas meldando istoryikas
Te imajinas ser el eroe
De todas las aventuras
Livros viejos, livros muevos
Sosh komo el buen vino
Ke se beve, no importa, ande i kuando
I sin duda, yo, vos prefero en ladino