EN KONKLUSION
David Fintz Altabe
En fin, kualo es la vida,
Keridos amigos?
Estansias en un poema,
Kapitulos en una novela.
Amores ganados i pedridos.
El sol todos los dias nase,
Sielos pretos aparasen i se aklaran,
Pasajeros somos todos en este viaje,
Rikos o proves todos tenemos ke pagar
por muestro pasaje.
Un pasaje, a vezes yeno de pena i de dolor
I otras vezes de alegria i de amor,
Ma ni uno ni otro para siempre va kedar,
Al kavadijo del dia en la tierra vamos a pozar.
Ma dainda, al pasarmos unos i otros,
Ke se vea luz en tus ojos.
Bive kada dia komo si el ultimo fuera,
Los momentos del pasado rekuerda.
Komo otros te tienen ayudado
Estiende a otros tu mano
En tu alma ke ayga piadad
Mas nunka va aboltar la oportunidad.