AKI YERUSHALAYIM #75- Djulio 2004

LA TRADISION DE "KORTAR MORTAJA"
por Moshe SEVILLA-SHARON

Una tradision Sefaradi ke al parecer no fue ainda bastante investigada es la de "kortar mortaja". El artikolo sigiente tiene komo eskopo de dar solo una idea jenerala de la tradision i no una analiza definitiva. Este lavoro fue realizado grasias al ayudo valutozo de la Sra. Bella Bichacho-Shenmenek (Avimeleh) orijinaria de Samsun, Turkia ma ke observo la tradision en Ankara i del Sr. Moshe Yishay, de Monastir, Yugoslavia. En konsekuensia, el artikolo sigiente trata de la tradision de " kortar mortaja " segun fue (i ainda es, en Ankara) observada en estas dos komunidades djudias sefaradis.

      En munchas kulturas del mundo existe esta preokupasion de la persona de asigurarse de antes ke tenga un kanton ande sera enterrado i ke en el dia de su muerte los funerayes se pasen komo es el uzo. La preokupasion proviene en grande parte de la opinion ke el ke no es enterrado segun el uzo, no pasa al "otro mundo". Una otra razon de esta preokupasion es el dezeo de la persona de dar lo mas poko posivle de pena a su famiya i parientez en akel dia de dolio en el kual no se podra muncho pensar sovre los aspektos "teknikos" del enterramiento. Ansi es ke en munchas kulturas del mundo la djente kudia a merkarse un pedaso de tierra en un semeterio (espesialmente i si posivle al lado de la tomba de sus keridos) ainda muncho tiempo, a vezes anyos, antes del dia de la muerte. En las kulturas materialmente mas adelantadas, komo por exemplo en Estados Unidos, djente rika uza mizmo entrar en kontakto kon una kompania ke se okupa de los aparejos finales i planea detaliadamente las fazas de los funerayes, el uzo siendo mas kristiano ke djudio. El uzo djudio-sefaradi de kortar mortaja es, puede ser, el mas Interesante de entre los uzos tokando a los aparejos mensionados ariva.

KUALO ES "MORTAJA"?

      La mortaja, komo se puede entender de la rayiz etimolojika del biervo, es el vistido en el kual es emburujado el puerpo del muerto antes de ser enterrado. Es este un vistido ke puede ser de un solo pedaso (Monastir) o puede ser un vero kostum -asta guantes i boneto (Ankara). La ropa empleada es blanka i delgada i la kustura non muy delikada.

LA TRADISION

      Al deredor de los 60 anyos de edad, la persona aedada ke siente aserkarse "la buena ora", deside de aparejarse la mortaja, segun lo ke me fue kontado por el Sr. Yishay de Monastir. La persona "de lo ke no tenia, ya se aprontava un poko de paras (moneda) para azerse la mortaja."

      La desizion de kortar mortaja -una vez tomada- aliviana el korason del aedado o la aedada i le kavzan grande satisfaksion, komo si se dezbarasara de una fuerte preokupasion.

      La karakteristika de la tradision es ke la desizion de kortar la mortaja i la seremonia ke la sige, son dominadas por una grande alegria. Komo lo vamos a ver mas abasho, el d?a de kortar mortaja es komo un vero dia de boda (los dos informantes insistieron sovre el biervo "boda") En este dia son invitados parientes, amigos i vizindado. Se kome, se beve i se kanta. Las kantikas no son espesiales al d?a: Son estas kantikas alegres "a la vieja", ma tambien otras kantikas mas modernas en diferentes linguas - lo esensial siendo ke sean alegres. En esta atmosfera de alegria son tomadas las mizuras de la persona ke se esta aziendo mortaja, i despues la ropa es kortada i kuzida.
Komo ya lo dishimos mas ariva, examinaremos aki dos variantes de la tradision, la de Monastir i la de Akara.

EN MONASTIR, YUGOSLAVIA

      Komo dicho, el proseso entero empesa kon la desizion de aparejar la mortaja. El aedado o la aedada (a vezes los dos endjuntos) toman la desizion i informan a sus parientes i amigos ke tal i tal dia se kortara mortaja i en este dia todos se arekojen en su (o sus) kaza.

      Antes del dia de kortar mortaja se aparejava la ropa. En esta faza, la tradision segun observada en Monastir prezenta una diferensia interesante en komparasion a la tradision de Ankara. En Monastir la mortaja era kortada de lino fino ke era teshido kon grande kudio. El lino krudo era batido bien i de esto eran travados ilos. Del ilo ansi travado era teshida la ropa de la kuala se devia kortar la mortaja.

      Siendo ke la ropa de mortaja devia ser blanka, mientres ke el lino en su estado natural es kui (1), la ropa era metida a buyir alientro de una kaldera i a la agua era metido un poko de siniza, lo ke asigurava el enblankesimiento. La ropa era a vezes deshada 12 asta 24 oras alientro de la agua kon siniza para ke se enblankeska.

      En el dia fiksado, kuando los invitados ya estavan todos en kaza, entre los kantes i bailes de "boda" se tomava la "mizura". En Monastir la persona se espand?a en basho (esto no era nunka echo en pies) i ansi la mizura era tomada, sin mirar muncho por la exaktitud. Despues de esto, vinia el momento de kortar la ropa i en la primera tijera se echavan konfites (bonbones blankos) sovre la ropa, se kantava i se empesava a komer i bever.

      Si se tratava de dos personas, se kortavan naturalmente dos mortajas. La ropa kortada era despues kuzida en forma de una larga roba; los puntos de kustura eran floshos i non regulares.

EN ANKARA, TURKIA

      En Ankara la persona deside (la tradision existe ainda) de kortarse mortaja porke "sin mortaja no se entra a la tierra." Un detalio interesante en la tradision de Ankara es ke la persona ke des?de de kortarse mortaja invita a los ke kere invitar, diziendo: "Tengo dia, tala data es mi d?a." Esto ya abasta a dar a entender.

      En esta sivdad la mortaja es kortada de ropa pronta, blanka i delgada naturalmente, ke se merka de una botika. Segun la tradision, komo es observada en esta sivdad, las mizuras son tomadas en pies o no son tomadas del todo. El ke save kortar -de entre los invitados- korta la ropa mas o menos segun las dimensiones de la persona. Aki tambien en la primera tijera son echados konfites, todo en kantando kantikas alegres.

      La diferensia importante en la tradision de Ankara es ke aki no es kortada una simple roba sinon ke un kostum entero: Boneto, jaketa larga (asta los djenoyos), roba larga (asta los pies), guantes i mizmo un kavesaliko. La ropa ansi kortada es, aki tambien, kuzida de mano i en flosho.

      La tradision de kortar mortaja, lo ke tiene de interesante i de karakteristiko, es ke reflekta el dezeo de la persona de azer aparejos para su muerte, sin ke sepa kuando se va murir. De este punto de vista i akavidandose de no azer komparasiones demazia jeneralas, se puede dizir ke ay una sierta asemejansa entre este uzo i el del ashugar ke se empesa a aprontar sin saver kuando se va kazar la ija. La atmosfera de boda ke reyna en la seremonia de kortamiento de la mortaja es otro punto ke tienen en komun estos dos uzos tan kontrarios i distinktos. Esta tradision sefaradi apunta fuertemente la naturaleza kon la kuala la muerte es resivida i en fakto djustifika el refran bien konosido: "Komo ay naser ay i murir."

(1) Kui (del Turko "koyu") : Kolor eskura (Fransez: "foncé").

Volver