AUTORIDAD NASIONALA DEL LADINO
Kacha del No. 75 de Aki Yerushalayim
|
AKI YERUSHALAYIM #75- Djulio 2004 LA
KORTADURA DE FASHADURA En la epoka moderna en la kuala estamos biviendo, el aprontamiento de la fashadura i otros menesteres del bebe es muy simple. Una mujer ke esta asperando kriatura tiene solo ke entrar a uno de los grandes magazenes ke venden lo ke nesesita un bebe i enkomendar lo ke es menester, sin tener ke kuzir nada eya mizma Ma aun kon esto es bueno saver komo se rejian muestras madres a este sujeto, anyos atras, i kualos eran los ermozos uzos i kostumbres ke presedavan el parto, komo por enshemplo la "Kortadura de Fashadura." Poko tiempo despues ke se anunsiava el prenyado de una rezin kazada, se empesavan tambien los aparejos para la fashadura de la kriatura. Aparejos ke se empesavan al kuatren o sinken mez del prenyado i ke jeneralmente devian terminarsen asta el sieten mez por miedo de un parto antes de su tiempo. A la seremonia de "Kortadura de Fasahdura" eran invitadas las mujeres de la famiya, amigas i vizinas. Una de las mujeres de la famiya ke tenia padre i madre en vida i ke eya mizma era madre de kriaturas, tenia el privilejio de "echar tijera", kere dizir kortar la primera kamizika del bebe. La fashadura kontenia entre otras panyales de hase i de fanela, kamizikas, kuleros, fashas i mas. Durante la seremonia se echava konfites sovre las ropas i naturalmente se adjustavan las bendisiones apropriadas komo "parto kolay" o "eskapamiento bueno". En Saloniko i en la rejion de la Trakya era de uzo de kortar una kamiza larga, komo simbolo para vidas largas. Si nasia ijo le vistian esta kamiza en el dia del Brit Mila i si era ija en el dia de la viola. Los sefaradis de Izmir uzavan kuzir, en desparte de las fashas para el bebe, otruna fasha para el Sefer Tora, ke era entregada al kal por la madre, antes o despues del nasimiento. Esta fasha era kuzida de ropas karas i buenas i brodada kon ilos de seda. |