AKI YERUSHALAYIM #75- Djulio 2004

SOVRE LA SINYIFIKASION DE LAS INISIALAS SAMEH-TET
por Yitshak Navon

      Munchos pensan, en Israel ansi ke en varias partes de la Diaspora, ke las inisialas ebreas "sameh-tet", ke los rabinos sefaradis uzavan adjustar serka de sus firmas, son la abreviasion de las palavras "sefaradi-ta'hor" (sefaradi puro), o sea sefaradi de kasta, desendiente en linya direkta de los djudios ekspulsados de Espanya.

      A dizir la verdad, yo no pudi nunka akseptar esta interpretasion. El termino mizmo de "ta'hor", ke implika una manera de pureza de sangre, era algo ke me paresia inakseptable. Durante largo tiempo estuvi bushkando otra eksplikasion, mas konforme a mi manera de pensar, asta ke un dia me akodri ke, despues de la "Birkat 'haMazon" (la bindision ke era dicha despues de komer), mi padre uzava dizir Kavos buenos ke mos de el Dio! Lo ke el demandava kon esto era ke el Dio le permeta de akavar su vida sin sufrir de una de las hazinuras ke deshan al ombre dezmamparado..."Esto pronto a murir agora mizmo, dizia el, ma enkamado - no!" - a lo kualo mi madre respondia imediatamente kon la palavras "Barminan!"

      No es posible, me demandi, ke las inisialas sameh-tet metidas por los rabinos sefaradis serka de sus firma, sinyifikavan solamente "sof tov" o "sofo tov", en ebreo "kavo bueno ke tenga"? Esta eksplikasion me paresio muncho mas lojika i razonable, ma la kestion era: komo provarla?

      Me fui onde el profesor Efraim Aurbach, prezidente del Kongreso de Sensias Djudaikas, i le demandi ke pensa de esta interpretasion?

      -Siguro ke tienes razon, - disho el - i esto por 2 razones:

      Prima - Ay rabinos eshkenazis tambien ke uzavan adjustar serka de sus firma las inisialas sameh-tet, i es siguro ke no azian esto pensando ke estas eran las inisialas de las palavras "sefaradi ta'hor".

      Sigunda - Ay algunos kavzos en los kualos serka de las firmas de rabinos aparesen no las inisialas sameh-tet, sino ke las palavras mizmas: sof tov, o sofo tov o mizmo en arameo sofo letav.

      Es klaro entonses ke las inisialas sameh-tet ke aparesen serka de las firmas de rabinos sefaradis, no sinyifikan de ninguna manera ke eyos se konsideravan komo "sefaradis puros", sino ke eran devidas simplemente al uzo de adjustar, kada vez ke se firmava una letra o un dokumento, una manera de rogativa al Dio, ke les de un "kavo bueno".

Volver