AKI YERUSHALAYIM #75- Djulio 2004

DONNA GRASIA NASI:
"LA SINYORA" DE ESTAMBOL

      Una de las mas interesantes i importantes figuras en la istoria de los djudios de Turkia es Donna Grasia Nasi, esta mujer ke por su rikeza, su saviduria i su enfluensa, yego a una tala fama ke los djudios de su tiempo la yamavan simplemente "La Sinyora".

       Donna Grasia nasio en Portugal, en los primeros anyos del siglo XVI, en una famiya de marranos, de djudios ke avian fuyido de la Inkizision de Espanya ma aun kon esto, avian sido ovligados de konvertirsen al kristianizmo todo en manteniendo en sekreto sus fe en la relijion djudia.

       Donna Grasia ke era muy rika se fue de Espanya a Beljika i de ayi paso a Italia ; en 1553 sovre la invitasion del sultan turko Süleyman el Manyifiko, yego a Estanbol onde se instalo en un grande i ermozo palasio en la uria del Bosfor.

       Eya dezvelopo muy buenas relasiones kon el Sultan i aprovecho su influensa para ayudar a los djudios no solo en Turkia sino ke en otros paizes tambien, segun se puede ver por enshemplo, de su aksion kontra la sivdad de Ancona, en Italia.

       Esta era una sivdad onde, en la primera metad del siglo XVI, se avia dezvelopado una komunidad djudia rika i efloresiente. Una buena parte de los djudios de esta sivdad avian yegado sovre la invitasion del Papa Paolo III, i avian ayudado a dezvelopar las relasiones komersialas kon paizes ajenos, aziendo de Ancona uno de los prinsipales portos italianos en el Mar Adriatiko.
Ma la situasion troko en 1555, kuando yego al poder el Papa Paolo IV, ke kito leyes antisemitikas, ovligando a los djudios de Ancona a bivir en un geto i limito sus aktividades komersiales. La situasion se deterioro ainda mas, kuando 51 Djudios fueron arrestados komo marranos, "krimen" por el kual, en akeyos dias, la pena era de ser kemado bivo.

       Al yegarle las primeras novedades sovre este dezvelopamiento, Donna Grasia se adreso immediatamente al Sultan Süleyman el Manyifiko demandandole de intervenir. I en efekto, el Sultan embio al Papa una letra akavidando, en terminos muy serios i duros, ke si los djudios de Ancona no seran liberados, el responderia tomando mizuras kontra los kristianos en su imperio.

       Esta letra tuvo un rezultado immediato i el Papa ordeno de liberar a los djudios de Ancona. Ma el orden yego solo despues ke 25 de los Djudios aprezados ya avian sido matados en medio de las flamas, lo ke kavzo un grande estremesimiento en el mundo djudio.

       En reaksion a este akto salvaje de las otoridades de Ancona, Donna Grasia yamo a los komersantes djudios del mundo entero a boykotar al porto de esta sivdad i embiar sus merkansias al porto de Pizarro. Este boykot ke fue en realidad el primer akto politiko de su djenero en la istoria de la Diaspora, kaje ke reusho; ma en fin de kuento el duvo ser anulado en segito a la presion de los djudios de Ancona djustamente, algunos de entre los kualos se espantaron ke el Papa tome mizuras de reprezalia kontra eyos.

       Ma mizmo si no reusho, este boykot fue eskrito en la istoria komo el primer kavzo en el kual los djudios aprovaron de emplear sus fuersa ekonomika para luchar kontra sus persekutores, la primera vez en la kuala fue solevantada la posibilidad ke los djudios tomen mizuras al nivel internasional para salvar a sus ermanos.

       De este punto de vista se puede dizir ke Donna Grasia fue la prekursora de la lucha ke es echa oy dia para ayudar a los djudios ke estan en apreto en diversas partes del mundo.

Volver