AKI YERUSHALAYIM #75- Djulio 2004

DE AVILA SALIO LA SPLENDOR DEL ZOHAR
por Avner Perez

      El Zohar (Splendor) es konsiderado, al lado de la Biblia i del Talmud, komo una de las tres ovras kanonikas del djudaizmo. Este es el livro de baza de la Kabala (mistisizmo djudio) i en el se topan los sekretos de la kreasion, del universo i de todos los mundos ke lo konstituyen: el mundo vizible i los mundos de arriva ke estan enkuviertos. La influensia del Zohar depaso los limites del mundo djudio. Al prinsipio de la epoka del Renasimiento, a la fin del siglo 15, algunos sirkolos kristianos tambien empesaron a interesarsen en la Kabala i estudiaron traduksiones de siertas partes del Zohar.

      Sigun la tradision, el autor del Zohar es Rabi Shimon Bar Yohay, un gran savio ke bivio en la Tierra Santa en el siglo II. Durante 1000 anyos el livro desparesio asta ke fue deskuvierto de muevo por el gran rabino i kabalista espanyol A-Ramban (Nahmanides, 1194-1270) ke bivio en Gerona, salio de Espanya en 1263 (despues de la polemika de Barcelona) i se establesio en la Tierra Santa. Ayi, segun la lejenda, topo el Zohar i lo embio a su ijo en Gerona,. De ayi, mos konta la lejenda, este livro santo fue yevado milagrozamente por el viento a Zaragoza (o Alicante) onde lo topo R. Moshe de Leon (1240-1305). En este punto se enkontra la lejenda kon la realidad i empesa el kuento de los atadijos misteriozos de Moshe de Leon kon el Zohar.

      Siete sivdades gregas pretenden ser la sivad natala del famozo Homero. En Espanya ay, de mizmo, unas kuantas sivdades ke pueden pretender ser asosiadas kon el gran kabalista R. Moshe de Leon (1240-1305), el jenial autor del Zohar. La alkunya de Leon es una klara indikasion sovre su orijin de la sivdad de Leon, en el Norte de Castilla, onde nasio en 1240. Sigun Yitshak de Ako, el era konosido tambien komo Moshe de Guadalhajara (oy: Guadalajara) onde bivio a lo menos asta 1291. Despues de este anyo i asta su muerte en 1305 el bivio en Avila. Sigun la lejenda, el topo el manuskrito del Zohar en Zaragoza. En fin, R. Moshe de Leon tuvo estrechos kontaktos kon los kabalistas de Gerona, aun ke su ovra kabalistika es diferente de manera bazika de la Kabala del sirkolo de Gerona.

      En 1305 yego de Erets Israel a Espanya el kabalista Yitshak de Ako, kon la intension de investigar las raizes del Zohar i la identidad de su autor. El reusho a enkontrarse en Valladolid kon R. Moshe de Leon, ke lo invito a su kaza en Avila para amostrarle el manuskrito antiguo i orijinal del Zohar ke tenia en su poder. Moshe de Leon murio antes ke tuviera lugar el enkontro, ma aun kon esto, Yitshak de Ako kontinuo su investigasion. Su testimonio - publikado, de manera fragmentaria, por R. Avraam Zacut (Zacuto) (1452-1515) en su livro Yohasin (Linaje), Constantinopla, 1566 - se melda komo una novela detektiva. Las trasas ke topo en su bushkedad yevavan todas a Avila. Es de esta sivdad ke salieron las primeras kopias manuskritas del Zohar, eskritas de mano de R. Moshe de Leon el mizmo. A esta sivdad tambien yego R.Yitshak de Ako para rezolver la enigma del Zohar i de su autor. En Avila bivio en akeya epoka el riko Yosef de Avila, arekavdador de dasios ke tenia munchos bienes en esta sivdad. En el kuadro de los testimonios arekojidos por R. Yitshak de Ako sovre los manaderos del Zohar, el traye un testimonio ke noto de boka de uno de los abitantes djudios de la sivdad, R. David de Pankorvo. Sigun este, despues de la muerte de Moshe de Leon, Yosef de Avila bushko a konvenser a su bivda de darle el manuskrito del Zohar, prometiendole en kontraparte de kazar a su ijo kon su ija.

      En baza de las memorias de R. Yitshak de Ako, i de komparasiones kon ovras orijinales de R. Moshe de Leon, los investigadores - en primer lugar el gran investigador de la Kabala, el Profesor Gershom Sholem - yegaron a la konkluzion ke el verdadero autor del Zohar no es otro ke R. Moshe de Leon. El Profesor Yeshaya Tishbi, el kontinuador de Gershom Sholem, ekspreso su opinion ke R. Moshe de Leon eskrivio la gran parte del Zohar despues de 1293, kere dizir ke esta grande ovra fue kompozada en Avila.

      Ke es lo ke tiene el Zohar ke lo aze tan espesial i tan diferente de otras ovras de la literatura kabalistika? En primer lugar devemos notar ke las ideas del Zohar no estan ekspresadas de un modo sistematiko, no estan organizadas segun un metodo mental, sino mediante komentarios i interpretasiones mistikas de versikolos i frazas de la Biblia ansi ke de otras partes de la literatura relijioza djudia. De esta manera, los grandes trezoros del djudaizmo ke se krearon durante miles de anyos se reflektan en el Zohar i resiven ayi una interpretasion mueva i freska, a vezes muy sorprediente i no abitual.

      Es verdad ke la manera en la kuala las ideas del Zohar aparesen en el teksto es konfuza i puede embrolyar el meldador, darle la impresion ke se trata de un livro enigmatiko i oskuro. Ma aki se topa tambien la grasia i el enkanto de esta ovra. Tiene la fuersa de poder avlar no solo a los savios de la Kabala, sino ke tambien a todo el ken save avrir su razon i sus sentidos para absorbar mesajes artistikos i mistikos, sigun lo aze, por enshemplo, kon algunas ovras poetikas.

      La segunda karakteristika ke kale notar kuando se avla del Zohar es su tendensia a uzar un lenguaje simboliko i metaforiko. Es verdad ke para entender lo ke dize el teksto kale desifrar los simbolos ke lo komponen i, sin tener las yaves para azerlo, el teksto parese enigmatiko i ilojiko. Ma por otro lado esta karakteristika tambien es la ke aze el Zohar un livro tan bivo i avierto a varias interpretasiones. Parese ke es esta kualidad ke dio al Zohar su prestijio i autoridad i ke lo izo un manadero de inspirasion para varias jenerasiones de kreadores en la Kabala ansi komo en otras ramas de la kultura djudia i no djudia. Todo esto mete a Moshe de Leon, el gran sivdadano de Avila, en una alta pozision en la literatura universala.

      300 anyos despues del Zohar, bivio en la mizma sivdad de Avila, Santa Teresa de Jesus, ke eskrivio ayi, entre otras, su ovra Las Siete Moradas o el Castillo. Kale notar aki ke uno de los kapitolos fundamentales del Zohar es el de Eyhalot (Palasios), una deskripsion de los "Siete Palasios" de la parte superior del paradizo, onde las almas se enaltesen i se purifikan kon sus orasiones. Es ke Santa Teresa konosia estos “Palasios" del ke bivio en su sivdad 300 anyos atras i fue influensada por su ovra en la deskripsion ke dio eya de las "Siete Moradas"?

      El Zohar tuvo grande influensa sovre la literatura relijioza en ebreo i en ladino. Munchos livros de moral en ladino son bazados sovre la Kabala i inkluyen sitasiones del Zohar. El Rabino Avraam Finzi trezlado munchos kuentos del Zohar i los publiko basho el titolo Leket a-Zohar (Seleksiones del Zohar). Su livro fue imprimido tres vezes: Belgrad, 1859; Izmir 1877, Saloniko 1877. En la segunda parte del livro Yaakov Yismah (Yaakov se Alegrara) de R. Yaakov Yafe Ashkenazi, Izmir 1877, se topan munchos pasajes trezladados del Zohar.
De estos livros, i otros mas, se puede ver komo esta ovra echo ondas rayizes en la kreasion literaria djudeo-espanyola tambien.

Volver