AKI YERUSHALAYIM #75- Djulio 2004

LETRA DEL REDAKTOR

Keridos lektores,

      Kuando en Avril 1979 publikimos el primer numero de Aki Yerushalayim, una broshura polikopiada de 18 pajinas solo, no podiamos imajinarmos ni en muestros mijores esfuenyos ke yegariamos a kumplir 25 anyos de publikasion ininterumpida, al servisio de la kultura djudeo-espanyola.

      Si reushimos en esto, malgrado todos los problemas i difikultades ke tuvimos ke superar, es porke Aki Yerushalayim esta kumpliendo una funksion muy importante: la de abasteser a los amantes de la kultura djudeo-espanyola material de lektura en ladino, ke les permeta de kedar en kontakto kon esta lengua ke tanto keremos. Otra importante funksion de la revista es de servir de tribuna a todos los ke keren tornar, o kontinuar a ekspresarsen en ladino, en eskriviendo artikolos, kuentos o poezias, anyos despues ke a munchos ya les paresia ke esta lengua esta agonizando i desparesera despues de una jenerasion. Por muestra buena suerte, 50 anyos i mas despues ke empesimos a oyir estas opiniones pesimistas, el ladino i su kultura no amostran dinguna tendensia a konformarsen a estas previziones.

      En desparte de la aktividad en el kampo universitario i akademiko ke se dezvelopo de manera impresionante (en Israel solo ay agora 5 universidades i dos sentros akademikos ke son aktivos en este kampo) se krearon mas revistas i otros periodikos ke tienen unas kuantas pajinas en ladino i en diversas partes del mundo ay mas i mas grupos de amantes de esta lengua ke se reunen para avlarla i oyir konferensias, kantes o kuentos en ladino. I lo mas importante, en Israel fue kreada la Autoridad Nasionala del Ladino ke reflekta la importansia dada aki a esta lengua i su kultura i la prontitud del governo de ayudar a mantenerlas i asegurar sus futuro.

      En el numero espesial ke estamos publikando kon okazion de este aniversario vos prezentamos una seleksion de los mijores i mas interesantes artikolos, kuentos i poezias publikados asta agora en Aki Yerushalayim ke daran, ansi lo esperamos, una idea de la rikeza i diversidad de muestra kultura. Los temas de los kualos podimos tratar no son ainda ke una chika parte solo de muestro patrimonio kultural, ma agora ke se esta despertando i enfuertesiendose kada vez mas el intereso enverso muestra kultura esperamos ke en los proksimos numeros de Aki Yerushalayim i de las otras publikasiones sefaradis podremos enrikeser ainda mas muestros konosimientos en este kampo.

Volver