LA PAJINA DJUDEO-ESPANYOLA de AKI YERUSHALAYIM
AUTORIDAD NASIONALA DEL LADINO
 

PAJINA DE ENTRADA

AKI YERUSHALAYIM

SEFARAD

INSTITUTO MAALE ADUMIM

LIBRERIA SEFARAD

AUTORIDAD NASIONALA DEL LADINO

PERIODIKOS

ASOSIASIONES I ORGANIZASIONES

JENEALOJIA SEFARADI

 

      La Autoridad Nasionala del Ladino fue kreada en 1997, en baza de una ley adoptada por la Keneset el 17.3.1996. Konformandose a lo ke fue estipulado en esta ley, el Ministro de Edukasion i Kultura de entonses, el Sr Zevulun ‘Hamer, nombro a los 21 miembros del Konsejo de la Autoridad, kon a sus kavesera el V Prezidente del Estado, Sr Yitzhak Navon, komo prezidente, i komo vise-prezidente, el direktor de la revista Aki Yerushalayim, Sr. Moshe Shaul.

      En su primera sesion, en Novembre 1977, el Konsejo de la ANL eskojo al Sr Aaron Koen al posto de direktor, i a las sigientes personas komo miembros del komite exekutivo, en desparte del prezidente Yitzhak Navon i del vise-prezidente, Moshe Shaul, ke ya fueron nombrados por el Ministro de Kultura: Alegra Amado Ben-Yitzhak, Mordehay Arbell, Yeoram Gaon, Avner Perez i Moshe Testa. (Entremientres tuvieron lugar unos kuantos trokamientos i los Sres M. Arbell i A. Perez fueron remplasados por los Srs. Meir Gabay i Bentsion Nahmias).

BUTOS DE LA ANL

      Sigun la ley para la kreasion de la Autoridad Nasionala del Ladino, sus butos son:

  • Propagar al seno del puevlo el konosimiento de la kultura djudeo-espanyola en todas sus formas, promoviendo a este efekto la investigasion de esta kultura, su ensenyansa i su difuzion, entre otras en los medios de komunikasion.
  • Ayudar a la fundasion i al enreziamiento de institusiones aktivas en el kampo de la kultura djudeo-espanyola.
  • Promover, enkorajar i ayudar al arekojimiento, dokumentasion i katalogasion de los trezoros de la literatura djudeo-espanyola.
  • Promover, enkorajar i ayudar a la edision de livros de autores kontemporaneos ke eskriven sovre temas de la kultura djudeo-espanyola, ansi ke ovras de valor de la literatura djudeo-espanyola, en sus lengua orijinala o en traduksion al ebreo.
  • Organizar i promover aktividades de informasion i esklaresimiento sovre las komunidades sefaradis ke fueron eksterminadas en la Shoa i las graves konsekuensas ke esto tuvo para la kultura djudeo-espanyola.

AKTIVIDADES

      En los 7 anyos de aktividad, desde su fundasion en 1997, la ANL ya izo numerozas aktividades i empeso en numerozos proyektos, de entre los kualos traemos aki una parte solo:

  • Ayudo a las 5 universidades en Israel onde se ensenya el ladino i su kultura
  • Distribusion de stipendias anuales a los ke estudian estas materias
  • Ayudo a la publikasion de livros para el estudio del ladino
  • Finansamiento del proyekto de “Bibliografia Anotada de los livros en ladino en las Biblioteka Nasionala i otras bibliotekas mas”
  • Mikrofilmamiento de la koleksion de jurnales en ladino del Instituto Ben Zvi
  • Kolokio internasional (en 1999) sovre la grafia i ortografia del ladino
  • Organizasion de un seminario annual para aktivistas en el kampo de la kultura djudeo-espanyola
  • Ayudo a las aktividades de los “Sirkolos de Kultura Djudeo-espanyola” ke se krearon ultimamente en diversas partes del paiz.
  • Ekspozision ”Suenyos de Espanya: 500 anyos de livros en ladino”, ke fue mostrada en Israel i en 7 sivdades de Espanya
  • Dias de estudio, serias de konferensias i tadradas kulturales sovre aspektos diversos de la kultura djudeo-espanyola
  • Ayudo a la publikasion de livros, diskos i filmos sovre estos temas etc.

    Volver